پنجاب:سموگ کی وجہ سے سکولوں کے اوقات میں تبدیلی

لاہور(جانوڈاٹ پی کے)محکمہ  اسکولز  ایجوکیشن  پنجاب  نے  اسموگ کے  پیش نظر صوبے  بھر میں   سرکاری  اسکولوں کے اوقات  تبدیل کر دیے۔

محکمہ اسکولز ایجوکیشن پنجاب کےنوٹیفکیشن کےمطابق  پیر سے جمعرات تک اسکولوں کے اوقات صبح  پونے 9 سےدوپہر ڈیڑھ بجےتک جب کہ جمعہ کے روز صبح پونے 9 سےدوپہر ساڑھے12بجے تک ہوں گے۔

اس سے قبل صوبائی وزیر تعلیم رانا سکندر حیات نے بھی سوشل میڈیا پر اسموگ کے پیش نظراسکولوں کے اوقات کی تبدیلی کا بیان جاری کیا تھا۔

دوسری جانب  سینئر صوبائی وزیر مریم اورنگزیب کا کہنا ہےکہ بھارت کی طرف سے آنے والی ہواؤں کے باعث لاہور آلودگی میں پہلے نمبر پر آتا ہے، اسموگ سے بچاؤ کے لیے بہت سے سخت اقدامات کیے ہیں ۔

خیال رہے کہ  لاہور سمیت پنجاب کے بیشتر وسطی علاقوں میں فضائی آلودگی شدت اختیار کرنے لگی ہے اورکھلی فضا میں سانس لینا صحت کے لیے خطرہ بن گیا ہے۔

لاہور کے علاقے راوی روڈ میں صبح کے اوقات میں ایئر کوالٹی انڈیکس 810 تک پہنچ گیا۔ ماہرین نے شہریوں کو ماسک کے استعمال کا مشورہ  دیا ہے۔