سینئر صحافی کے قتل کا منصوبہ ناکام،3اجرتی قاتل پکڑے گئے،صحافی کون تھا؟

راولپنڈی (جانو ڈاٹ پی کے)راولپنڈی میں سینئر صحافی کو ٹارگٹ کلنگ کا نشانہ بنانے کی کوشش ناکام ہوگئی، صادق آباد پولیس نے 3اجرتی قاتل گرفتار کر لیے۔ذرائع کے مطابق تینوں ملزموں نے محسن شاہ، اختر سندھو، قاسم سندھو اور سکندر سندھو سے طاہر نصیر کو قتل کرنے کی سپاری لی تھی۔ ملزمان نے سینیئر صحافی کو قتل کرنے کے لیے 2لاکھ روپے کی سپاری لی تھی۔ملزم 3دن تک سینئر صحافی کے گھر کی ریکی کرتے رہے ،ملزموں  نے 99 ہزار روپے بھی اپنے اکاؤنٹ میں منگوائے تھے۔ ملزمان احمد اور آکاش نے صحافی کو قتل کرنا تھا جبکہ وشال نے ملزمان کو اسلحہ مہیا کیا تھا۔تینوں اجرتی قاتلوں کو گاڑی اور اسلحہ سمیت سینئر صحافی کے گھر کے قریب سے پولیس نے گرفتار کر لیا۔ملزمان کو علاقہ مجسٹریٹ کی عدالت میں پیش کیا گیا، عدالت نے تینوں اجرتی قاتلوں کے جسمانی ریمانڈ کی استدعا مسترد کرتے ہوئے ملزمان کو جوڈیشل ریمانڈ پر جیل بھیج دیا۔