جیمز اینڈرسن کو نائٹ ہڈ کے اعزاز سے نواز دیا گیا

لندن (مانیٹرنگ ڈیسک) انگلینڈ کے معروف سابق فاسٹ باؤلر اور ٹیسٹ کرکٹ میں سب سے زیادہ وکٹیں حاصل کرنے والے جیمز اینڈرسن کو ونڈسر کیسل میں ایک تقریب کے دوران پرنسز این نے "نائٹ ہڈ” کے اعزاز سے نواز دیا۔

کرکٹ کے شعبے میں شاندار خدمات کے اعتراف میں 43 سالہ جیمز اینڈرسن کو اپریل میں سابق برطانوی وزیرِ اعظم رِشی سونک کی ریزائنیشن آنرز لسٹ میں شامل کیا گیا تھا۔

جیمز اینڈرسن نے جولائی 2024 میں لارڈز میں اپنے 21 سالہ کیریئر کا اختتام کیا تھا، اس دوران انہوں نے 188 ٹیسٹ کھیلنے کا اعزاز حاصل کیا۔

انہوں نے اپنے ٹیسٹ کیریئر میں 704 وکٹیں حاصل کیں جو کسی بھی فاسٹ باؤلر کی جانب سے سب سے زیادہ وکٹیں ہیں، سپن باؤلنگ میں مرلی دھرن 800 وکٹوں کے ساتھ سب سے آگے ہیں جبکہ شین وارن 708 وکٹیں حاصل کرنے کا اعزاز رکھتے ہیں۔

جیمز اینڈرسن نے ون ڈے انٹرنیشنل میں بھی 269 وکٹیں حاصل کر رکھی ہیں جو اب تک کسی برطانوی باؤلر کی سب سے زیادہ وکٹیں ہیں حالانکہ انہوں نے 2015 کے بعد کوئی ون ڈے انٹرنیشنل میچ نہیں کھیلا۔

بین الاقوامی کرکٹ سے ریٹائرمنٹ کے بعد جیمز اینڈرسن لنکاشائر کی جانب سے کھیلتے رہے اور 2024 سیزن میں شاندار کارکردگی دکھائی، ایک دہائی بعد ٹی 20 کرکٹ میں واپسی کی اور اپنی ٹیم کو فائنلز ڈے ایجبسٹن تک پہنچانے میں اہم کردار ادا کیا۔

اس کے علاوہ انہیں مانچسٹر اوریجنلز کی ٹیم میں دی ہنڈرڈ کے لیے وائلڈ کارڈ کنٹریکٹ بھی ملا جبکہ وہ 2025 سیزن میں بھی کاؤنٹی کرکٹ جاری رکھنے کے حوالے سے بات چیت میں مصروف ہیں۔