جے یو آئی اور پی ٹی آئی کا محمود اچکزئی کو اپوزیشن لیڈر بنانے پر اتفاق
اسلام آباد(جانوڈاٹ پی کے)جے یو آئی اور پی ٹی آئی نے قومی اسمبلی میں محمود خان اچکزئی کو اپوزیشن لیڈر بنانے پر اتفاق کرلیا۔
جےیوآئی کے سربراہ مولانا فضل الرحمان نے پی ٹی آئی وفد کے اعزاز میں اپنی رہائش گاہ پر عشائیہ دیا جس میں سابق اسپیکر قومی اسمبلی اسد قیصر، پی ٹی آئی کے صوبائی صدر جنید اکبر، شہرام ترکئی اور دیگر رہنما شریک ہوئے۔ ملاقات میں سیاسی اور خطے کی صورتحال پر تبادلہ خیال کیا گیا ۔
پی ٹی آئی وفد نے مولانا فضل الرحمان سے پارلیمنٹ میں اپوزیشن کو متحد کرنے کیلئے کردار ادا کرنے کی اپیل کی ،دونوں جماعتوں میں محمود خان اچکزئی کی بطور اپوزیشن لیڈر نامزدگی پر اتفاق ہوگیا۔
پی ٹی آئی قیادت نے خیبر پختونخوا میں قومی امن جرگہ کے انعقاد کی تجویز پر مولانا فضل الرحمان سے مشاورت کی جس کا مولانا نے خیر مقدم کیا۔ پی ٹی آئی وفد نے خیبر پختونخوا اسمبلی سے سینیٹ کی خالی نشست پر جے یو آئی سے تعاون کی درخواست بھی کردی۔
