آئی سی یو میں داخل ہونیوالے بھارتی کرکٹر شریاس ائیر کا فینز کیلئے خصوصی پیغام

سڈنی(جانوڈاٹ پی کے)آسٹریلیا کے خلاف میچ کے دوران کیچ پکڑتے ہوئے گرنے کے باعث پسلیوں میں شدید چوٹ لگنے کے بعد آئی سی یو میں داخل ہونے والے بھارتی ون ڈے ٹیم کے نائب کپتان شریاس ائیر کا انجری کے بعد پہلا باضابطہ بیان سامنے آگیا۔

25 اکتوبر کو  شریاس ائیر آسٹریلیا کےخلاف سڈنی میں سیریز کے  تیسرے اور آخری ون ڈے میں فیلڈنگ کےدوران انجری کا شکارہوئے تھے جہاں کیچ پکڑتے ہوئےان کی پسلیوں میں چوٹ آئی تھی۔

شریا س ائیر کی انجری سنجیدہ نوعیت کی ہوگئی تھی اور اندرونی بلیڈنگ کی وجہ سے انہیں کچھ وقت کیلئے انتہائی نگہداشت وارڈ میں داخل کرنا پڑا۔

تاہم شریاس ائیر نے انجری کے بعد اپنے پہلے بیان میں مداحوں کو صحت کے حوالے سے مثبت خبر دی ہے۔

29 سالہ کرکٹر نے سوشل میڈیا پلیٹ فارم ایکس پر مداحوں کا شکریہ ادا کرتے ہوئے بتایا کہ وہ آہستہ آہستہ صحت یاب ہو رہے ہیں۔

ائیر نے اپنی پوسٹ میں لکھا کہ میں اس وقت صحتیابی کے مرحلے میں ہوں اور ہر گزرتے دن کے ساتھ بہتر محسوس کر رہا ہوں۔ مجھے ملنے والی دعاؤں اور نیک تمناؤں کے لیے دل سے شکرگزار ہوں، یہ میرے لیے بہت معنی رکھتا ہے۔ آپ سب کا شکریہ کہ آپ نے مجھے اپنی دعاؤں میں یاد رکھا۔