کسٹمز نے کراچی ائیرپورٹ پر کروڑوں کی منشیات سمگل کرنےکی کوششیں ناکام بنادیں

کراچی(جانو ڈاٹ پی کے)پاکستان کسٹمز نے کراچی ائیرپورٹ پر منشیات پاکستان اسمگل کرنے کی کوششیں ناکام بنادیں۔

ایف بی آر کے مطابق تھائی لینڈ سے آنے والے پارسل سے 5 کروڑ 20 لاکھ روپے مالیت کی 1.69 کلوگرام چرس برآمد کی گئی۔

ایف بی آر کے بیان میں بتایا گیا کہ بیلجیئم سے آنے والے پارسل سے 6 کروڑ 20 لاکھ روپے مالیت کی1945 ایکٹیسی گولیاں ملیں، نشہ آور گولیاں ویکیوم کلینر کے پارسل میں چھپائی گئی تھیں۔

ایف بی آر کے مطابق دنیا بھر میں ای کامرس کے بڑھتے رجحان کے باعث سرحد پار سامان کی ترسیل میں اضافہ ہوا، کریمنل نیٹ ورکس ک جانب سے ڈاک سسٹم کو منشیات کی اسمگلنگ کے لیے استعمال کے واقعات بڑھ رہے ہیں۔

ایف بی آر کے مطابق پاکستان کسٹمز کی مؤثر نگرانی سے بڑی مقدار  میں منشیات لوگوں تک پہنچنے سے  پہلے  پکڑی جارہی ہیں، پاکستان کسٹمز انسداد منشیات اسمگلنگ کی کڑی نگرانی کے لیے پر عزم ہے۔