سوڈان:جنگجوؤں نے ہسپتال میں گھس کر460افرادکو قتل کردیا

دارفر(انٹر نیشنل ڈیسک)سوڈان کے علاقے دارفور میں ریپڈ سپورٹ فورسز کے جنگجوؤں نے اسپتال میں گھس کر 460 افراد کو قتل کردیا۔اقوام متحدہ کا کہنا ہے کہ سوڈان کی ریپڈ سپورٹ فورسز نے شمالی دارفور کے صوبائی دارالحکومت پر قبضہ کرنے کے بعد مریضوں سمیت اسپتال میں موجود سیکڑوں افراد کو قتل کردیا۔امریکی میڈیا کے مطابق ریپڈ سپورٹ فورسز کے جنگجوؤں نے گھروں میں گھس کر بھی لوگوں کو تشدد کا نشانہ بنایا۔امریکی میڈیا کا کہنا ہے کہ اعداد وشمار بتانے والے ایک گروپ کے مطابق سوڈان پر کنٹرول حاصل کرنے کے لیے 2 سال سے جاری جھڑپوں میں اب تک 40 ہزار افراد مارے گئے ہیں۔اس تنازع میں ایک کروڑ چالیس لاکھ سے زیادہ افراد کے بے گھر ہونے سے دنیا کا بدترین انسانی بحران پیدا ہوگیا ہے۔